Հայտնի շոումեն և հեռուստահաղորդավար Գարիկ Մարտիրոսյանն անսպասելիորեն լքել է ««Գալուստյան» պրոդյուսերական կենտրոն» ՍՊԸ-ի հիմնադիրների կազմը, որտեղ նրա գործընկերը կատակերգու դերասան Միխայիլ Գալուստյանն էր։ Այս մասին գրում է «Звездач» Telegram-ալիքը:

Քանի որ լուրն անակնկալ էր շատերի համար, սոցցանցերում արդեն գրում են. «Գալուստյանը նորից բաժանվո՞ւմ է»։

Ընկերությունը գործում է 2011 թվականից և մասնագիտացած է գեղարվեստական ստեղծագործության, կինոյի և հեռուստատեսության արտադրության, ձայնագրման և ռադիոհեռարձակման ոլորտում: Ի սկզբանե դրա հիմնադիրներն էին Միխայիլ Գալուստյանը և Comedy Club-ի մասնակից Ալեքսեյ Նովացկին։ 2020 թվականի փետրվարին բիզնեսին միացավ Գարիկ Մարտիրոսյանը։ Մեկ տարի անց Նովացկին դուրս եկավ հիմնադիրների կազմից, և Գալուստյանի և Մարտիրոսյանի գործընկերությունը դարձավ հավասար՝ յուրաքանչյուրին 50 տոկոս։

Ըստ ՌԴ Իրավաբանական անձանց միասնական պետական ռեգիստրի տվյալների՝ Գարիկ Յուրիկի Մարտիրոսյանը ընկերության հիմնադիրների թվում չէ 2025 թվականի օգոստոսի 12-ից: Բիզնեսից դուրս գալու պատճառները պաշտոնապես չեն նշվում։

Վերջին տարիներին ընկերությունը կայուն ֆինանսական ցուցանիշներ ուներ։ Այսպես, 2024 թվականին եկամուտը կազմել է 3,1 միլիոն ռուբլի, իսկ մաքուր շահույթը՝ 2,9 միլիոն ռուբլի։ 2025 թվականին կազմակերպությունը բյուջե է փոխանցել 83,2 հազար ռուբլի հարկ։ Ընդ որում, ««Գալուստյան» պրոդյուսերական կենտրոնը» պետական մրցույթների չի մասնակցել, չի նկատվել արբիտրաժային գործերում և կատարողական վարույթներ չունի։

Ընկերության գլխավոր տնօրենը Միխայիլ Գալուստյանն է (Նշան Սերգեյի Գալուստյան):