Իռլանդիայի հանրային հեռարձակող RTE-ն հինգշաբթի հայտարարել է, որ Իռլանդիան չի մասնակցի հաջորդ տարվա Եվրատեսիլ երգի մրցույթին, եթե Իսրայելը մասնակցի։

«RTE-ի դիրքորոշումն այն է, որ Իռլանդիան չի մասնակցի 2026 թվականի Եվրատեսիլ երգի մրցույթին, եթե Իսրայելը մասնակցի,- ասվում է հայտարարության մեջ։- RTE-ն կարծում է, որ անբարոյական կլինի Իռլանդիայի մասնակցությունը՝ հաշվի առնելով Գազայում շարունակվող սարսափելի մարդկային կորուստները»։

Ինչպես նշում է AFP-ն, Իռլանդիան յոթ անգամ հաղթել է Եվրատեսիլում՝ ավելի շատ, քան որևէ այլ երկիր։ Վերջնական որոշումը կընդունվի, երբ Եվրոպական հեռարձակողների միությունը (EBU) որոշում ընդունի այս հարցի վերաբերյալ՝ հաշվի առնելով հուլիսին իր գլխավոր ժողովում մի քանի անդամների արտահայտած մտահոգությունները։

Իսպանիայի վարչապետ Պեդրո Սանչեսը մայիսին հայտարարել է, որ ապագայում Իսրայելը պետք է հեռացվի։ Նշելով, որ Ռուսաստանին թույլ չեն տվել մասնակցել 2022 թվականին Ուկրաինայում պատերազմի սկսվելուց ի վեր, նա ընդգծել է. «Իսրայելը նույնպես չպետք է դա անի, քանի որ մշակույթում մենք չենք կարող ունենալ երկակի ստանդարտներ»։