Կոչ եմ անում մեր ընդդմությանն այդքան խորը չմտնեն Սամվել Կարապետյանի քսակի մեջ, որովհետև դա որևէ հետևանքի չի հանգեցնելու: Այս մասին ԱԺ ամբիոնից հայտարարեց «Քաղաքացիական պայմանագիր» խմբակցության ղեկավար Հայկ Կոնջորյանը:

«Մի քանի կոպեկի համար հիմա այսպես ջերմեռանդորեն դուք լծվել եք Սամվել Կարապետյանի ունեցվածքի պաշտպանությանը, դուք բացարձակապես չեք ներկայացնում ՀՀ ժողովրդի ունեցվածքի պաշտպանության գործունեությունը:

ՀՀ տերը ՀՀ ժողովուրդն է, այդ թվում պետական ռեսուրսների և քաղաքական գործունեություն իրականացնող ուժերի քաղաքական տերը ևս ՀՀ ժողովուդրն է: Դուք ի՞նչ տիրոջ եք ծառայում, երբ որ քանի օր է արդեն զբաղված եք կոնկրետ մարդկանց, կոնկրետ շրջանակների՝ Հայաստանից դուրս կապիտալ կուտակած շրջանակների քաղաքական շահերի պաշտպանությամբ»,- ասաց նա:

Կոնջորյանը նշեց, որ ապօրինի գույքի ու թալանի իրական շահառուները եկել են իրենց մեղադրում են, թե ունեցվածք են խլում: «Սա ՀԷՑ-ը խլելու մասին չէ, սա ՀԷՑ-ն իր տերերին՝ ՀՀ ժողովրդին, վերադարձնելու մասին է: Գառնիկ Դանիելյանը եկել այստեղից բարոյականության դասեր է տալիս մեր խմբակցության անդամներին, ասում է՝ խելքի եկեք: Ով բարոյականությունից խոսա, Դուք գոնե պապանձվե՛ք, երկրում ինչքան սրբապիղծ տեռորիստ կա, կողքը կանգնած եք»,- ասաց նա:

Կոնջորյանն առաջարկեց, որ սկսեն քննարկել նաև ՀԷՑ-ի գործունեության հետ կապված քննիչ հանձնաժողով ստեղծելու հարցը: «Այդպես մենք կփորձենք բազմաթիվ հարցերի պատասխան տալ, սկսած՝ ՀԷՑ-ի մասնավորեցումից, որը տեղի է ունեցել Քոչարյան Ռոբերտի օրոք, վերջացրած մնացած հարցերը»,- ասաց նա: